MEIWURKERS SOCHT!!
Der binne fiergeande plannen om yn septimber 2025 oan de Pikesyl yn Abbegea in gloednij iepenloftspul op te fieren:

FRJEMD YN ABBEGEA
Yn de twadde wrâldkriich wie Abbegea in noch lytser doarpke as no. Midden op ‘e romte yn de gemeente Wymbritseradiel wennen sa’n 100 eigen ynwenners, mar tidens de oarloch ferdûbele dat oantal hast. Troch de isolearre lizzing wie it in daalders plak foar ûnderdûkers. In soad frjemd folk dus: fan ûnder oare Joadske, Russyske en Hongaarske komôf. Se fûnen leafdefol ûnderdak by de ynwenners fan Abbegea en omkriten. Dat wie net sûnder gefaar, want ferried en ûnminslik machtsfertoan fan de besetter leine altyd op ‘e loer. Ek doe’t yn 1942 foar it earst yn de Fryske skiednis de Mattheüs Pasje opfierd waard troch ynwenners en frjemdlingen yn in grôtfolle tsjerke, harke de besetter mei.
De Abbegeasters hawwe yn dy dagen troch harren hert en hûs iepen te stellen én in tûke alarmynstallaazje te betinken, harsels én it frjemde folk beskermje kinnen. Mar hoe giet dat tsjintwurdich? Werhellet de skiednis himsels? Is frjemd folk like wolkom as eartiids? Of binne it no yndringers dy’t de hûzen fan ús jongerein ôfpakke? En wat bart der yn Abbegea en omkriten as de gemeente in plan lansearret om minsken dy’t op de flecht binne op te fangen yn tydlike wenten yn de buurt? Bliuwe se dan frjemd yn Abbegea?
It iepenloftspul ‘Frjemd yn Abbegea’ besiket mei de histoarje as basis in brêge te slaan nei hjoeddedei.
Foar dat iepenloftspul, skreaun troch Dick Jansen en ûnder regy fan Tineke Broers (mei assistinzje fan Ytsje Kramer) binne we op syk nei spilers, spylsters, sjongers en sjongeressen, musikanten,dekorbouwers, kaartferkeapers, kostúmmakkers, ensfh koartsein: nei in hiel soad minsken dy’t harren meiwurking op hokker wize dan ek jaan wolle oan dit bysûndere barren.
De muzyk en muzikale lieding is yn fertroude hannen fan Gerben van der Veen.

Wolst dy graach ynsette, skriuw dan in mailtsje oan:
iepenloftspulabbegea@outlook.com
Dan sette wy dy op ús frijwilligerslist en nimme kontakt op as wy dy mear definitieve ynformaasje jaan kinne oer in ynformaasjejûn en/of audysjes.